Bangura verður vísað úr landi

Knattspyrnumanninum Al Bangura verður vísað úr Bretlandi eftir að honum var ekki veitt hæli þar í landi.

Bangura er leikmaður Watford og kom til Bretlands fyrir fjórum árum síðan frá Sierra Leone, eftir að hafa gengið í gegnum miklar raunir í heimalandi sínu.

Hann er nítján ára gamall og varð faðir fyrir einungis níu dögum síðan. Félagið stóð heilshugar á bak við áfrýjun hans sem hann tapaði nú í dag.

Forráðamenn Watford segjast eyðilagðir vegna þessa og segja að líf hans verði í hættu þegar hann komi aftur til síns heimalands.

Hann skrifaði undir atvinnumannasamning við Watford í apríl árið 2005 og hefur síðan þá komið við sögu í fimmtíu leikjum og skorað í þeim eitt mark.