Serbíustjórn loks mynduð

Lýðræðissinnaflokkar Serbíu náðu í gær loks samkomulagi um að mynda saman ríkisstjórn, fjórum mánuðum eftir að þingkosningar fóru fram í landinu. Frá þessu greindi þingforsetinn Tomislav Nikolic, sem sjálfur er leiðtogi öfgaþjóðernissinna.

Með stjórnarmyndunarsamkomulaginu var því afstýrt að flokkur hans, Róttæki flokkurinn, kæmist til valda.

Nikolic tjáði AP-fréttastofunni að Boris Tadic forseti og Vojislav Kostunica, starfandi forsætisráðherra, hefðu náð saman um stjórnarmyndunina. Samkvæmt fréttum serbneskra fjölmiðla felst meðal annars í samkomulaginu að Nikolic haldi ekki þingforsetaembættinu sem hann var kjörinn í fyrr í vikunni.

„Mér var tilkynnt að samkomulag um myndun nýju ríkisstjórnar­innar hefði náðst,“ sagði Nikolic. „Ég mun kalla saman þing, sennilega á morgun, til að kjósa nýju stjórnina.“

Nikolic sagðist frekar myndu segja sjálfur af sér en láta skipta sér út fyrir annan. Hann sagðist ennfremur vænta þess að Kostunica myndi halda forsætisráðherraembættinu.

Hefði ekki tekist að mynda stjórn fyrir næsta þriðjudag hefði þurft að boða til kosninga á ný, en ljóst þykir að eingöngu Róttæki flokkurinn hefði grætt á því, en hann er nú þegar stærsti flokkurinn á þingi.

Ráðamenn á Vesturlöndum og grannríki Serbíu fylltust að gefnu tilefni áhyggjum af því hvert Serbía stefndi þegar Nikolic náði í vikunni kjöri til embættis þingforseta. Róttæki flokkurinn átti aðild að stjórn Slobodans Milosevic á tíunda áratugnum, þegar Serbar háðu stríð við fyrrum bræðraþjóðir sínar í gömlu Júgóslavíu.

Serbía tók í gær við formennsku í Evrópuráðinu og mun gegna henni næsta hálfa árið. Vissir fyrirvarar voru þó á því að hin væntanlega nýja Serbíustjórn væri fær um að fara fyrir stofnuninni, sem beitir sér einkum og sér í lagi í mannréttindamálum álfunnar, þar sem serbnesk stjórnvöld hafa ekki reynst fær um að verða við þeim kröfum sem Evrópuráðið hefur beint til þeirra, fyrst og fremst varðandi handtöku og framsal eftirlýstra stríðsglæpamanna.