Harðar deilur milli Arsenal og Tottenham

Nú er útlit fyrir að enska knattspyrnusambandið þurfi að skerast í hatramma deilu grannliðanna Arsenal og Tottenham í tengslum við miðasölu á undanúrslitaviðureignir liðanna í enska deldarbikarnum.

Samkvæmt reglum í keppninni þarf heimaliðið að láta af hendi 15% miðanna til gestanna, en Arsenal hefur neitað að veita Tottenham þá 9.000 miða sem félagið á rétt á og bera við að öryggisreglur geri ekki ráð fyrir nema um 5.000 miðum fyrir gestina á 60.000 manna Emirates leikvellinum.

Tottenham getur á sama hátt gefið út 5.000 miða fyrir gestina á White Hart Lane og gerði það þegar liðið mætti Southend - en nú hefur liðið neitað að selja nema 4.000 miða til Arsenal ef félagið ætli ekki að selja Tottenham 15% sinna miða á hinn leikinn.

Þá eiga liðin einnig í deilum út af miðaverði, en á meðan Tottenham rukkar fullt verð fyrir miða í deildarbikarnum, hefur Arsenal veitt afslátt á sína miða og það hefur einnig valdið deilum því útiliðið á rétt á 45% af tekjum sem koma í kassann hjá heimaliðinu. Enska knattspyrnusambandið er talið muni skerast í leikinn eins fljótt og auðið er, en tíminn til þess er nú að verða naumur og hafa forráðamenn Tottenham gert athugasemdir við það að ef sambandið úrskurðar í málinu á fimmtudag eins og til stendur - hafi félagið aðeins fimm daga til að ganga frá miðakaupum fyrir leikinn annan miðvikudag.