Manchester United sigraði Schenzen stórt

Manchester United vann stórsigur á Schenzen í þriðja leik sínum á æfingatúr sínum í Asíu. Leikar enduðu 6-0 og skiptust mörkin jafnt á milli leikmanna. Nani skoraði sitt fyrsta mark fyrir félagið í leiknum.

Ryan Giggs skoraði fyrsta markið eftir sendingu frá Wayne Rooney. Rooney skoraði svo sjálfur annað markið eftir sendingu frá Giggs. Giggs var ekki hættur og lagði upp mark fyrir Nani sem skoraði sitt fyrsta mark fyrir United síðan hann kom til liðsins í sumar. Staðan því 3-0 í hálfleik.

Í seinni hálfleik skoruðu svo John O´Shea eftir sendingu frá Christiano Ronaldo, Ronaldo eftir sendingu frá Rooney og loks Chris Eagles sem skoraði með glæsilegu langskoti. United endar svo Asíuferðina þegar þeir mæta Guangzhou Pharmaceutical þann 27. júlí.