Söng rangan þjóðsöng

Yves Leterme, sem sækist eftir embætti forsætisráðherra Belgíu, söng rangan þjóðsöng í viðtali við sjónvarpsfréttamenn á þjóðhátíðardaginn á laugardag. Í stað þess belgíska söng hann franska þjóðsönginn.

Leterme, sem er leiðtogi Flæmska kristilega demókrataflokksins, reynir nú að mynda samsteypustjórn í Belgíu. Atvikið þykir hið vandræðalegasta og var myndband af því komið á netið í gær. Þar sést að Leterme syngur „La Marseillaise“, þjóðsöng Frakka, í stað „La Brabanconne“, belgíska þjóðsöngsins.

Seinna um daginn náðust myndir af Leterme að tala í síma í miðri trúarathöfn í tilefni sjálfstæðis Belgíu.