Demban var á við mánaðar úrhelli

Bjarga þurfti hundruð manns úr þungum flóðum í Bretlandi með þyrlum og bátum í gær. Miklar rigningar hafa valdið gríðarlegum vatnsflaumi í bæjum og meðal annars á fæðingarstað leikskáldsins William Shakespeare.

Vatn flæddi inn í kjallara Royal Shakespeare leikhússins í Stratford-upon-Avon um 160 kílómetrum norðan við London. Hætt var við sýningu á Macbeth vegna flóðanna, þar sem nær ómögulegt var að komast að leikhúsinu.

Margir ökumenn gistu í bílum sínum, fastir á götunum, og aðrir leituðu bifreiða sem þeir höfðu skilið eftir á föstudag. Truflanir hafa orðið á flug- og lestasamgöngum. Flóðin gætu hafa valdið tjóni upp á mörg hundruð milljónir punda. Rigning í nokkra klukkutíma á föstudag var á við mánaðarbirgðir af úrhelli.