England kemst á EM

Martin O´Neill, stjóri Aston Villa, biður fólk um að hætta að orða sig við stöðu landsliðsþjálfara og segir að enska landsliðið eigi enn möguleika á að komast á EM þó útlitið sé vissulega svart.

Stjórnarformaður Villa hefur þegar sagt að hann muni ekki standa í vegi fyrir O´Neill ef hann langi að taka við enska landsliðinu. O´Neill segir þetta ósanngjarnt gagnvart Steve McClaren landsliðsþjálfara.

"Mér finnst mjög óþægilegt að sitja hérna og svara spurningum um enska landsliðið. Stjórnarformaðurinn var bara að svara "hvað ef" spurningu og það borgar sig ekki að fara út í þessa sálma," sagði O´Neill.

"Mér finnst að enska landsliðið hafi verið óheppið í leiknum gegn Rússum og mér finnst liðið vera búið að spila mjög vel undanfarið. Ég trúi enn að liðið komist á EM og ég tel Rússana eiga gríðarlega erfitt verkefni fyrir höndum í Ísrael," sagði O´Neill - en örlög Englendinga eru mikið til í höndum Ísraela þann daginn, því þeir eiga litla von um að komast á EM ef Rússarnir vinna þar.

"Steve McClaren hefur rétt fyrir sér þegar hann segir að úrslitin í riðlinum ráðist á 12 leikjum en ekki einum leik og mér finnst liðið eiga skilið að fara áfram úr riðlinum - þegar og ef það gerir það. Það er ósanngjarnt að spyrja mig spurninga um enska landsliðið og því ætla ég að reyna að forðast það," sagði Villa-stjórinn.