Jewell er til í að taka aftur við Wigan

Paul Jewell, fyrrum knattspyrnustjóri Wigan í ensku úrvalsdeildinni, segist ekki útiloka að taka aftur við liðinu ef til hans verður leitað. Wigan er án stjóra eftir að Chris Hutchings var rekinn á mánudaginn.

Jewell er góður vinur stjórnarformanns Wigan og hefur verið orðaður mikið við endurkomu til félagsins. Hann útilokar ekki að snúa aftur.

"Ég var hissa þegar ég las það í blöðunum að ég væri inni í myndinni því ég hef ekki verið í sambandi við einn eða neinn hjá félaginu. Eftir sex mánuði í fríi er ég hinsvegar tilbúinn að taka til starfa á ný og ég mun skoða öll tilboð sem ég fæ inn á borð til mín," sagði Jewell.

Hann hætti hjá Wigan í maí á síðasta ári og sagðist þá hafa verið búinn að fá nóg af boltanum í bili. Þá var hann búinn að bjarga Wigan frá falli í síðustu umferðinni. Jewell var hjá Wigan í sex ár og kom liðinu upp um tvær deildir á því tímabili og breytti því í spútniklið í úrvalsdeildinni.