Móðir Capello óttast um son sinn

Evelina Tortul, móðir Fabio Capello, óttast að enska pressan muni gera syni sínum og fjölskyldu hans lífið leitt eftir að hann tekur að sér starf landsliðsþjálfara í Englandi.

Capello er margreyndur enda lengi starfað sem knattspyrnustjóri á Ítalíu og Spáni en engu að síður óttast Tortul um framtíð sonar síns.

„Ég er ekkert allt of ánægð með þetta," er haft eftir henni í Daily Telegraph. „Dagblöðin og sjónvarpsstöðvarnar munu nú hundelta hann dag og nótt og tala illa um allt sem hann gerir - hvort sem það er af hinu góða eða slæma. Mínir friðsælu dagar eru á enda komnir."

„Vandamálið með fjölmiðla er að þegar liðinu gengur vel er allt í himnalagi. En þegar það tapar skera fjölmiðlar þjálfarann á háls. Ég er móðir hans og því mun ég ekki verða ánægð með það."