Innbrot hjá foreldrum Paul Scholes

Foreldrar knattspyrnumannsins Paul Scholes hjá Manchester United eru skelkaðir eftir að vopnaðir innbrotsþjófar brutust inn í íbúð þeirra á dögunum og stálu bifreið þeirra.

Stewart Scholes vaknaði þegar brotist var inn í íbúðina og mætti þar nokkrum ungum mönnum vopnuðum hnífum og krikketkylfu.

"Konan mín fór niður og mætti þeim þegar þeir komu inn í íbúðina. Hún öskraði á mig og þegar ég kom niður í stofu voru þeir þarna veifandi hnífunum. Þeir sögðu mér að láta sig hafa lyklana af bílnum. Ég sagði þeim að taka bíllyklana og hypja sig," sagði Scholes eldri, sem býr í úthverfi Manchester.

Bófarnir höfðu sig að lokum á brott í Audi-bifreið þeirra hjóna en þau sluppu ómeidd frá þessari óskemmtilegu reynslu. Stewart sagði son sinn hafa brugðist illa við tíðindunum.