Warnock er eins og vælandi krakki

Fyrrum knattspyrnudómarinn Graham Poll heldur hvergi aftur af sér í pistli sem hann skrifar um Neil Warnock í Daily Mail í dag. Poll segir dómara ekki hlakka til að vinna með nýráðnum stjóra Crystal Palace sem hann kallar óvinsælasta mann í knattspyrnunni.

Hér fyrir neðan fer ágrip af pistli dómarans.

"Ég á bágt með að trúa að sé til óvinsælli persóna í knattspyrnuheiminum og Warnock og ég á erfitt með að trúa því að dómarar hlakki til að dæma leiki Palace í framtíðinni - ekki fyrr en Warnock verður dæmdur í sitt fyrsta leikbann í það minnsta.

Warnock er mesti vælukjói sem hefur þjálfað lið á Englandi og hefur lent í útistöðum við alla sem hann hefur unnið með. Hann segist sjálfur vera með dómararéttindi og montar sig alltaf af því þegar hann ræðir dómgæslu - en ég hef nú ekki vitað til þess að hann hafi verið að dæma leiki undanfarið og hann virðist gleyma því að menn verða að starfa við dómgæslu til að halda réttindum sínum.

Vælið í Warnock er oftar en ekki byggt á fáfræði hans á reglum leiksins og missir oft á tíðum alveg sjónar af því sem hann þarf að gera fyrir lið sitt því hann eyðir svo miklum tíma í að svívirða dómara og aðstoðarmenn þeirra.

Ég heyrði hann öskra á hinn geðþekka Gary Kelly hjá Leeds fyrir nokkru þar sem Warnock sagðist óska þess að hann fótbrotnaði í næsta leik. Þvílíkur heiðursmaður. Í hverjum leik eyðir hann hálftíma í að rakka dómarana niður af því honum finnst hann eiga rétt á því.

Það er alltaf ein aukaspyrna eða eitt innkast sem veldur því að liðið hans tapar og því kennir hann dómurunum um allt sem miður fer hjá liðnu hans. Ég á vini sem halda með Palace og þeir hafa allir haft samband við mig og harmað að Warnock sé tekinn við Palace.

Þeir eiga alla mína samúð og ég vona að dómararnir muni standa uppi í hárinu á honum á næstunni og refsa honum fyrir öfgafulla framkomu hans, því hann er að skemma leikinn sem hann segist elska.

Það er bara synd að hann skuli ekki elska fótboltann eins mikið og hann elskar sjálfan sig," skrifar Graham Poll.