McClaren sleikir sárin í 250 milljóna villu á Barbados

Steve McClaren situr ekki auðum höndum þrátt fyrir að hafa verið rekinn frá enska landsliðinu á dögunum. Hann er nú að festa kaup á villu í Karabískahafinu fyrir 250 milljónir króna, sem er megnið af peningunum sem hann fékk í vasann þegar hann var rekinn frá landsliðinu.

Daily Mail greinir frá því að þetta sé önnur glæsivillan sem McClaren kaupi sér á Barbados, en sú nýja er sögð helmingi stærri en sú gamla. Margir af frægustu íþróttamönnum Bretlandseyja eiga eignir á svæðinu sem kallað er Royal Westmoreland. Þeirra á meðal eru Joe Cole, Rio Ferdinand og Gary Lineker.

McClaren hefur verið gagnrýndur nokkuð fyrir að sjá ekki sóma sinn í að segja af sér eftir tapið gegn Króötum, en hann þrjóskaðist við og lét reka sig sem gerði það að verkum að hann fékk yfir 300 milljónir í vasann fyrir starfslokasamning sinn.