Mikið mannfall í loftárásum í Afganistan

Íbúar í Helmand-héraði í Afganistan telja að á bilinu fimmtíu til áttatíu almennir borgarar hafi týnt lífi í loftárás herliðs Atlantshafsbandalagsins í nótt. Talið er að mörg börn séu meðal fallinna. Talsmaður NATO staðfesti að loftárás hefði verið gerð en sagði ekki staðfest að almennir borgarar hefðu fallið. Vitni segja sprengjum hafa rignt yfir svæðið í tvær til þrjár klukkustundir.

Árásin var gerð sex klukkustundum eftir hörð átök herliðs NATO og Talíbana á jörðu niðri. Fram kemur á fréttavef BBC að á bilinu tvö hundruð og fjörutíu til þrjú hundruð og tuttugu afganskir borgarar hafi týnt lífi í árásum herliðs Atlantshafsbandalagsins það sem af sé þessu ári.

Afgönsk stjórnvöld segja Talíbana oft leita skjóls í íbúðabyggð þar sem þeir skipi almennum borgurum að veita sér skjól.