Byssumaður drepur gísl og sjálfan sig hjá NASA í Houston

Byssumaður skaut karlmann til bana með skammbyssu og svo sjálfan sig í höfuðstöðvum Bandarísku geimferðastofnunarinnar NASA, Johnson Space Center, í Houston í kvöld. Maðurinn hafði tekið tvennt í gíslingu. Kona, sem hann hafði tekið líka og bundið fasta við stól með límbandi, slapp með minni háttar meiðsl.

Bygging 44 við stofnunina var rýmd eftir að skotið var af byssu þar inni. Í byggingunni eru á fimmta tug rannsóknarstofa og samskiptabúnaður.

Ljóst varð eftir að lögregla kom á staðinn, að sögn Fox fréttastofunnar, að hann hefði tekið tvo gísla, konu og karlmann. Lögreglan var að reyna að ná sambandi við mannin þegar byssuskot heyrðist. Fljótlega eftir að lögregla réðst inn til atlögu fann hún manninn látinn af skotsári á höfði á annarri hæð. Maðurinn sem hann hafði drepið fannst látinn á sömu hæð. Hann hafði verið skotinn í brjóstið, að því er virðist fljótlega eftir að þessir atburðir hófust.

Sjónarvottar segja manninn hafa gengið inn á fund og beint byssu að einum fundarmanna. Hann skipaði öðrum á fundinum að koma sér út. Óstaðfestar fréttir herma að það hafi staðið til að segja manninum upp störfum í dag.

Umsátur lögreglunnar stóð í fjórar klukkustundir. Lögreglan náði aldrei sambandi við byssumanninn meðan á því stóð.

Byssumaðurinn er sagður hafa verið milli fimmtugs og sextugs, starfsmaður undirverktaka hjá NASA.