Við vorum þreyttir

Martin Jol, stjóri Tottenham, sagði að þreyta leikmanna hefði verið helsta ástæða þess að hans menn misstu niður 2-0 forystu gegn varaliði Arsenal í enska deildarbikarnum í kvöld. Tottenham var yfirspilað á heimavelli í kvöld og mátti þakka fyrir að halda jöfnu gegn spræku liði gestanna.

"Við byrjuðum mjög vel, héldum boltanum í okkar röðum og náðum að setja á þá pressu. Við vorum yfir 2-0 og þetta leit bara mjög vel út. Annað var hinsvegar uppi á teningnum í síðari hálfleiknum og ég held að mínir menn hafi verið þreyttir. Arsenal var með eina sjö menn í liðinu sem voru vel ferskir og við liðum fyrir að missa Berbatov af velli, því hann heldur boltanum svo vel. Eina leiðin til að vinna Arsenal er að setja á þá pressu, en þeir réðu alveg ferðinni í síðari hálfleik," sagði Martin Jol, sem enn á eftir að vinna á Arsenal-grýlunni á White Hart Lane.