Villidýrið gekk laust á White Hart Lane

Brasilíumaðurinn Julio Baptista setti á svið sýningu í kvöld þegar Tottenham og Arsenal skildu jöfn í fyrri undanúrslitaleik sínum í enska deildarbikarnum. Dimitar Berbatov kom Tottenham yfir í leiknum, en það var Baptista sem sá um tilþrifin eftir það - ekki ósvipað og gegn Liverpool í 8-liða úrslitunum á dögunum.

Heimamenn í Tottenham höfðu ekki unnið sigur á erkifjendum sínum í sjö ár en liðið byrjaði mjög vel gegn óstyrkum varnarmönnum Arsenal. Dimitar Berbatov kom Tottenham yfir á 12. mínútu eftir varnarmistök gestanna og aðeins 9 mínútum síðar skoraði téður Baptista sjálfsmark og útlitið því orðið mjög dökkt fyrir Arsenal og herbragð Arsene Wenger að tefla fram unglingaliði sínu leit skyndilega út fyrir að vera slæm hugmynd.

Baptista fékk gott tækifæri til að minnka muninn í fyrri hálfleik en misnotaði færið og því fóru leikmenn Arsenal þungir á brún til búningsherbergja. Það átti eftir að breytast í þeim síðari þegar gestirnir tóku öll völd og Baptista jafnaði leikinn verðskuldað með mörkum á 64. og 77. mínútu. Þeir Cesc Fabregas og Theo Walcott fengu svo góð tækifæri til að gera út um leikinn í lokin en höfðu ekki heppnina með sér.

Bæði lið urðu fyrir áfalli þegar Dimitar Berbatov hjá Tottenham og Alexander Hleb þurftu báðir að fara meiddir af velli, en segja má að niðurstaðan í kvöld hafi verið nokkuð sanngjörn og ljóst að Tottenham bíður gríðarlega erfitt verkefni í síðari leiknum á útivelli.