Ipswich býður Beckham til æfinga

Jim Magilton, stjóri Ipswich, hefur boðið David Beckham að æfa með sínum mönnum til að halda sér í formi. LA Galaxy er nú komið í frí í MLS deildinni en Beckham spilaði ekki nema 360 mínútur á tímabilinu vegna meiðsla og þarf að halda sér í formi svo hann sé inni í myndinni með enska landsliðinu.

Beckham mun mjög líklega æfa með ensku félagi til að sanna form sitt fyrir landsliðsþjálfaranum og Magilton segir að því sé upplagt fyrir hann að æfa með Ipswich á Portman Road - aðeins steinsnar frá heimili kappans.

"Það væri fínt að fá hann hingað ef það hjálpar honum að vera í formi. Það myndi hleypa lífi í æfingarnar að fá mann eins og Beckham hingað og þó ég vildi helst fá hann til að spila með okkur - óttast ég að það sé ekki hægt," sagði Magilton.