Campbell tilbúinn ef að kallið kemur frá McClaren

Sol Campbell, varnarmaður Portsmouth, greindi frá því í gær að hann muni glaður svara kallinu ef að Steve McClaren muni óska eftir þjónustu hans í enska landsliðinu aftur. Campbell var sár eftir að honum var tilkynnt fyrir ári að hann væri dottinn úr landsliðshópnum, en McClaren las skilaboðin inn á talhólfið hans.

„Ég gef mig alltaf 100% í þau verkefni sem ég tek mér fyrir hendur þannig að ef að kallið berst þá gef ég mig allan í það," sagði Campbell. „Það eru allir að tala um að ég fái landsliðskallið og það er ánægjulegt. Ég hef spilað marga leiki fyrir England, sérstaklega mikilvæga leiki. Að spila fyrir þjóð sína er það besta sem maður gerir á ferlinum."