Fyrsti risaslagur tímabilsins á Anfield

Það fara fram þrír flottir fótboltaleikir í ensku úrvalsdeildinni í dag og þar á meðal er fyrsti risaslagur tímabilsins þegar Liverpool tekur á móti Chelsea á Anfield. Bæði liðin eru með fullt hús, Chelsea eftir tvo leiki en Liverpool aðeins einn þar sem leik vikunnar var frestað vegn þátttöku liðsins í meistaradeildinni.

Liðin teljast vera góðkunningjar eftir 15 leiki á síðustu þremur tímabilum en margir þeirra hafa verið markalitlir og lítil skemmtun. Jose Mourinho hefur lagt áherslu á frjálsari leik sinna manna og Benitez hefur keypt sóknarmenn í röðum þannig að nú vonast menn eftir sóknarleik og mikilli skemmtun í leik dagsins sem hefst klukkan 15.00.

„Það er mikilvægt að vinna leik gegn toppliði ekki síst til að senda út ákveðin skilaboð en þetta er bara einn leikur. Ef við ætlum okkur að

berjast um titilinn þurfum við ekki að vinna einn leik, við þurfum að vinna marga leiki,“ sagði Rafael Benitez, stjóri Liverpool, sem er ánægður með að hafa fleiri leikmenn til skiptanna.

Chelsea hefur ekki tapað í síðustu 16 leikjum sínum eða síðan þeir heimsóttu Anfield síðast, 20. janúar. Jose Mourinho fagnar því að John Terry sé búinn að ná sér af meiðslunum en á sama tíma hefur hann misst landa sinn Ricardo Carvalho í hnémeiðsli.

Það bíða líka margir spenntir eftir nágrannaslagnum í Manchester en það er ekki oft sem City-liðið kemur inn í leik gegn United með fullt hús og fjórum stigum meira en „stóri bróðir“. Sven-Göran Eriksson hefur farið frábærlega af stað með Man. City í sigrum á West Ham og Derby en Man. United á enn eftir að vinna sinn fyrsta leik eftir jafntefli við Íslendingaliðin Reading og Portsmouth. Leikurinn fer fram á Eastlands, heimavelli City, og hefst klukkan 12.30.

Síðasti leikur dagsins er á milli Blackburn og Arsenal á Ewood Park en bæði lið hafa byrjað tímabilið vel og unnið alla leiki sína í deild og Evrópukeppni.