Fimmtán tonn af olíu í sjóinn

Rússneski togarinn Olshana sökk í Tangarfirði í Færeyjum á fimmtudagskvöld. Skipið var á leið til fiskveiða þegar það strandaði, og var nýbúið að taka olíu.

Samkvæmt færeyska frétta­vefnum Sosialurin var reynt að draga skipið á flot en björgunar­aðgerðum lauk með því að það sökk á hafsbotn. Talið er að um fimmtán tonn af olíu hafi lekið í sjóinn, en tæplega þrjú hundruð tonn af gasolíu voru í skipinu þegar það sökk.

34 manna áhöfn var um borð í togaranum þegar hann strandaði, og var öllum bjargað.