Ástand annarra brúa kannað

Mun færri virðast hafa farist en óttast var í fyrstu þegar brúin í Minneapolis hrundi á háannatíma síðdegis á miðvikudag. Fimmta líkið var í gær fjarlægt úr rústum brúarinnar og tala þeirra sem saknað er lækkaði úr þrjátíu niður í átta.

„Það kom okkur á óvart að við skyldum ekki finna fleiri alvarlega slasaða eða látna,“ sagði Jim Clark, yfirmaður slökkviliðsins í Minne­apolis. „Mér finnst þetta hafa verið eins konar kraftaverk.“

Staðfest var í gær að fimm manns hefðu látist, en auk þess eru fimm í lífshættu af þeim 110 manns, sem særðust í slysinu. Ennfremur er átta manna saknað, en á fimmtu­daginn var óttast að tugir manna hefðu farist.

Fleiri lík hafa sést á kafi í ánni, en aðstæður voru þannig í gær að björgunarfólk treysti sér ekki til að ná þeim upp á land. Sterkir straumar eru í ánni og hætta stafar af rústum brúarinnar.

Ekki er enn komið í ljós nákvæm­lega hvað olli því að brúin gaf sig, en stjórnvöld í Minnesota fyrir­skipuðu að allar brýr sömu gerðar yrðu rannsakaðar ítarlega.

Meira en 70 þúsund brýr í Banda­ríkjunum eru taldar hafa einhverja byggingargalla, en verkfræðingar telja að það taki heila kynslóð að gera við þær allar.