Milljónir hafa þurft að flýja heimili sín

Nærri 200 manns hafa látist og 19 milljónir flúið að heiman vegna monsúnflóðanna í Bangladess og á Indlandi. Uppskera eyðilagðist víða og vegir fóru á kaf í flóðunum, sem stafa af hinni árlegu monsúnrigningu.

Á Indlandi voru flóðin mest norðan til en í höfuðborginni Mumbai þurfti fólk einnig að ösla vatnið upp í hné. Rigningarnar eru mikilvægar fyrir gróður í þessum heimshluta, en þegar rignt hefur dögum saman fara ár og fljót að flæða yfir bakka sína.

Monsúntímabilið í Suður-Asíu er frá júní fram í september ár hvert og jafnan lífshættulegt íbúum í þessum heimshluta. Á síðasta ári fórust þúsund manns, ýmist drukknuðu, létu lífið í aurskriðum, urðu fyrir rafmagni eða fórust þegar hús hrundu. Það sem af er þessu ári hafa 14 milljónir misst heimili sín á Indlandi og 5 milljónir í Bangladess.

Eitt versta atvikið varð á Indlandi á miðvikudaginn þegar 28 manns fórust með bát í vatnsmiklu fljóti. Of margir voru um borð í bátnum, en fólkið var að flýja heimaþorp sitt þar sem allt var komið á kaf.

Í Bangladess hefur þorpið Sirajganj orðið einna verst úti. Þar hafa tvö þúsund þorpsbúar neyðst til þess að yfirgefa heimili sitt.

„Flóðin hafa tekið frá mér allt sem ég á,“ segir Rahmat Sheikh, fertugur bóndi í Sirajganj. „Hrísgrjónareitirnir, tvær kýr og húsið mitt. Allt er þetta farið og ég veit ekki hvernig ég á að sjá mér farborða núna.“

Heilbrigðisstarfsfólk hefur ferðast um flóðasvæðin til að reyna að koma í veg fyrir útbreiðslu smitsjúkdóma á borð við taugaveiki, niðurgang og kóleru.

Í Uttar Pradesh á Indlandi unnu hermenn við að koma 500 íbúum burt úr einu þorpinu. Víða í Uttar Pradesh reis vatnsyfirborðið svo hratt að fólki tókst ekki að koma sér burt í tæka tíð.

„Vatnselgurinn kom svo hratt að við höfðum engan tíma til að bregðast við,“ sagði Vinod Kumar, íbúi í einu þorpanna í Basti-héraði. „Öllum eigum okkar hefur skolað burt. Við erum ekki með neinn mat, enga steinolíu og ekki einu sinni eldspýtustokk. Embættismennirnir segja að aðstoð sé á leiðinni, en ekkert hefur komið enn.“