Dýr ölmusa í Indónesíu

Fólk sem gefur betlurum pening getur átt von á að fá rúmlega 40.000 króna sekt í indónesísku borginni Medan nái frumvarp þess efnis fram að ganga. Betlararnir sjálfir munu eiga yfir höfði sér allt að sex vikna fangelsisdóm.

Markmið frumvarpsins er að hreinsa götur borgarinnar af betlurum sem sumir hverjir mynda skipulögð gengi sem áreita ferðamenn og íbúa á götum Medan að sögn Nabari Ginting hjá félagsþjónustu borgarinnar.

Ginting sagði könnun hafa sýnt að meðalbetlari í Medan sé með rúmlega 370 krónur eftir daginn sem er meira en meðaldaglaun í borginni.