Bamir Topi verður forseti

Bamir Topi verður næsti forseti Albaníu. Topi, leiðtogi Lýðræðisflokksins, fékk 85 atkvæði af 140 í kosningum á albanska þinginu á föstudaginn einu atkvæði meira en hann þurfti til að fá embættið.

Kjör Bamis var mörgum í Albaníu léttir því stjórnarflokkarnir, með Lýðræðisflokkinn í broddi fylkingar, og stjórnarandstöðuflokkarnir höfðu reynt þrisvar sinnum að koma sér saman um hver ætti að gegna embættinu. Ef flokkunum á þinginu hefði ekki tekist að kjósa forseta í þetta skipti hefðu þeir aðeins haft eitt tækifæri til viðbótar, annars hefði þurft að leysa þingið upp og blása til kosninga innan sextíu daga.