Leeds byrjar með 15 stig í mínus

Hið fornfræga fótboltafélag Leeds United fékk í gær heimild til þess að hefja leik í 3. efstu deild á Englandi. Leiktíðin hefst eftir viku en Leeds byrjar boltasparkið með 15 stig í mínus.

Leeds féll úr ensku úrvalsdeildinni í maí 2004 og í vor féll félagið úr 1. deild. Leeds fékk 46 stig en þar ljóst var að félagið myndi ekki halda sæti sínu í deildinni var óskað eftir greiðslustöðvun og í kjölfarið voru 10 stig dregin af félaginu.

Ken Bates aðaleigandi Leeds bauð skuldareigendum eitt pens fyrir hvert pund sem félagið skuldaði. Flestir gengu að þessu tilboði nema skattayfirvöld sem vildu fá sína skuld greidda að fullu, samtals 7,7 milljónir punda. Bates hækkaði þá tilboð sitt, bauð 8 pens fyrir hvert pund. Skuldir Leeds námu um 35 milljónum punda en voru fyrir þremur árum um 100 milljónir punda.

Um tíma leit út fyrir að Leeds fengi ekki heimild til þess að hefja keppni vegna þess að leikmönnum félagsins hafði ekki verið borguð laun. Knattspyrnuyfirvöld á Englandi ákváðu í gær að veita félaginu keppnisleyfi en að Leeds byrji með 15 stig í mínus. Leeds ætlar að áfrýja þessum úrskurði.