Þakkaði stuðninginn

George W. Bush, forseti Bandaríkjanna, tók á móti Elísabetu Englandsdrottningu í gær með mikilli viðhöfn við Hvíta húsið í Washington.

Yfir sjö þúsund gestum var boðið til athafnarinnar sem haldin var á suðurlóðinni. Í ávarpi sínu til drottningarinnar lagði forsetinn áherslu á mikilvægi bandalags Bretlands og Bandaríkjanna í stríðinu gegn hryðjuverkum og þá sérstaklega samstarf þjóðanna í Afganistan og Írak. Hann þakkaði drottningunni fyrir stuðninginn og sagði að samstarf þeirra væri vænlegast til að ná fram friði í heiminum.

Elísabet drottning sagði að nú væri kominn tími til að horfa fram á veginn og halda áfram að leggja áherslu á að gera heiminn öruggari og rækta vinskapinn á milli þjóðanna.

Öll umgjörð heimsóknarinnar var mjög formleg og í fyrsta sinn í forsetatíð George W. Bush var haldinn kvöldverður fyrir 134 gesti þar sem karlar voru klæddir í kjól og hvítt.

Þetta er í fimmta skipti sem drottningin heimsækir Bandaríkin en síðast kom hún 1991 þegar George Bush eldri var forseti. Aðaltilefnið að þessu sinni er 400 ára afmæli landnáms Englendinga í Virginíu.