Enginn komst lífs af

Enginn þeirra 114 manna sem voru í kenýsku farþegaþotunni sem hrapaði í skógi í Kamerún á föstudag komst lífs af. Þetta fullyrti Luc Ndjodo, fulltrúi þarlendra yfirvalda, eftir að hafa kannað vettvang slyssins. Aðspurður sagðist hann ekki hafa séð neina á lífi. „Nei,“ svaraði hann. „Ég var þarna. Ég sá engan.“

Vélin lenti í mýrlendi og sökk að stórum hluta í forarbrúnt vatn. Brak úr vélinni dreifðist um stórt svæði. Verið er að undirbúa að dæla vatninu burt og er þannig vonast til að hægt verði að finna lík allra farþeganna.

Mjög erfið skilyrði eru á svæðinu, þykkur skógur og tuttugu mínútna gangur þangað sem bílar komast næst. Því þarf að bera lík og líkamshluta á börum langa leið til að unnt sé að flytja látna í líkhús.

Vélin var á leið frá Douala, höfuðborg Kamerún, til Naíróbí, höfuðborgar Kenýu, og hrapaði eftir einungis tuttugu kílómetra flug. Ekki liggur fyrir hvað olli slysinu, en bandarískur sérfræðingur í flugmálum segir að í ljósi þess hversu snemma eftir flugtak vélin hrapaði bendi allt til þess að um stórkostlega bilun í byggingu vélarinnar hafi verið að ræða.