Fylgi Sarkozys hefur vaxið

Segolene Royal, forsetaframbjóðandi franskra sósíalista, varaði í gær við því að ofbeldi og uppþot gætu aukist í Frakklandi ef mótframbjóðandi hennar, hægrimaðurinn Nicolas Sarkozy, sigrar í forsetakosningunum á morgun.

„Það er hættulegt að kjósa Sarkozy. Ég vil ekki að Frakkland stefni í áttina að kerfishrottaskap,“ sagði hún í sjónvarpi í gærmorgun.

Stuðningsmenn Sarkozy sögðu þetta síðasta útspil hennar ekki viðeigandi.

Hins vegar býr franska lögreglan sig nú undir óeirðir í fátækrahverfum Parísar á sunnudagskvöldið, fari svo að Sarkozy beri sigur úr býtum.

Sarkozy er fyrrverandi lögregluforingi og síðar innanríkisráðherra. Hann aflaði sér töluverðra óvinsælda meðal þeldökkra og arabískra ungmenna árið 2005 þegar hann, þá innanríkisráðherra, kallaði þá sem átt höfðu í útistöðum við lögreglu í fátækrahverfunum „úrþvætti“ og hét því að hreinsa þá burt með vatni úr háþrýstidælum. Þá um sumarið brutust út óeirðir í fátækrahverfum Parísar sem stóðu í þrjár vikur.Margir Frakkar eru á hinn bóginn mjög hrifnir af því hve Sarkozy tók á glæpum af mikilli hörku eftir að hann varð innanríkisráðherra árið 2002.

Samkvæmt síðustu skoðanakönnunum fyrir kosningar, sem birtust í gær, hefur fylgi við Sarkozy vaxið á síðustu dögum og stefnir því allt í að hann verði næsti forseti Frakklands. Nýr forseti á að taka við fyrir 17. maí.