Sigur skoskra þjóðernissinna

Skoski þjóðernisflokkurinn SNP hrósaði sigri í Skotlandi og leiðtogi hans, Alex Salmond, gæti sem hægast orðið forsætisráðherra í nýrri stjórn skoska heimastjórnarþingsins.

„Ég held að nú sé nýr dagur að rísa, ekki bara í Skotlandi heldur út um allt land,“ sagði Salmond ánægður með sigurinn. Hann vill efna til kosninga um sjálfstæði Skotlands árið 2010.

Hvorki SNP né aðrir flokkar náðu þó hreinum meirihluta í Skotlandi. SNP fékk 47 þingsæti, aðeins einu fleira en Verkamannaflokkurinn sem fékk 46 þingsæti. Íhaldsflokkurinn kom í þriðja sæti með 17 þingsæti og síðan Frjálsir demókratar með 16 af alls 129 þingmönnum á þinginu.

Í meira en hálfa öld hefur Verkamannaflokkurinn fengið flest atkvæði í öllum kosningum í Skotlandi, þannig að úrslitin þar eru nokkurt áfall fyrir flokkinn.

Verkamannaflokkurinn tapaði sömuleiðis fylgi í Wales, þar sem einnig var kosið til heimastjórnarþings. Ennfremur varð tap Verkamannaflokksins í sveitarstjórnarkosningum um allt Bretland töluvert mikið, eins og búist var við.

Tony Blair forsætisráðherra sagði úrslitin þó ekki jafn slæm fyrir Verkamannaflokkinn og spáð hafði verið fyrirfram. „Allir sögðu að við myndum fá mikið högg, þetta myndi verða algjör ósigur, en það fór ekki svo,“ sagði hann.- gb