Herinn kallaður til vegna flóða í Bretlandi

Óveður og úrhellisrigning í gærkvöldi og nótt orsökuðu flóð á stórum svæðum í Bretlandi. Algjört umferðaröngþveiti skapaðist á helstu hraðbrautum Englands. Fjöldi ökumanna og farþega þurfti að gista í bílum sínum en helgin er ein mesta ferðahelgi sumarsins. Herinn og björgunarsveitir hafa unnið að því í allan dag að koma fólki til hjálpar.

Svæðið sem verst varð úti í flóðunum var Gloucesterskíri þar sem enn er unnið að því að bjarga fólki úr bílum sem sitja fastir í vatnselg. Hundruð ökumanna sátu einnig fastir í bílum sínum í nótt eftir að hellirigning lokaði M5 hraðbrautinni. Sumir þurftu að dúsa í bílunum í allt að tuttugu klukkustundir, margir án vatns og matar og enn situr fjöldi bifreiða fastur á hraðbrautinni.

Skólaleyfi hófust í landinu fyrir helgi og virðist slæm spá ekki hafa hindrað fjölskyldufólk í að leggja í hann, en þetta er ein mesta ferðahelgi sumarsins. Foreldrar sem festust í umferðinni lentu því í því að þurfa einhvern veginn að hafa ofan af fyrir börnunum í óveðrinu.

Sumir neyddust til að halda kyrru fyrir í bílum víða á svæðinu, en margir yfirgáfu þá og leituðu í neyðarskýli þar sem um tvö þúsund manns gistu í nótt. Sky fréttastofan greindi frá því að barn hafi fæðst í bíl sem var fastur í umferðaröngþveitinu. Lestarsamgöngur eru einnig í lamasessi á sumum svæðum.

Neyðarlínan fékk yfir sextán hundruð neyðarsímtöl á níu klukkustundum, það eru fimmfalt fleiri símtöl en vanalega.

Gordon Brown forsætisráðherra sagði viðbrögð björgunarsveita og hersins hafa verið til mikillar fyrirmyndar.

Gefin hafði verið út viðvörun til ökumanna um að vera sem minnst á ferðinni. Áfram er spáð mikilli rigningu og slæmu veðri og hafa verið gefnar út á annan tug flóðviðvarana.