Engar afsakanir lengur gildar

„Engar afsakanir geta lengur verið fyrir því að ná ekki samkomulagi,“ sagði Peter Hain, Norður-Írlandsmálaráðherra bresku stjórnarinnar, í Belfast í gær, daginn áður en nýkjörið heimastjórnarþing kemur saman á Norður-Írlandi.

Bæði hann og Dermot Ahern, utanríkismálaráðherra Írlands, lögðu ríka áherslu á að mótmælendur og kaþólskir mynduðu stjórn á Norður-Írlandi. Ekkert eigi að vera því til fyrirstöðu lengur. Takist það hins vegar ekki innan tveggja vikna verði heimastjórnarþingið leyst upp.

„Allir gengu til kosninga vitandi það að fresturinn rynni út 26. mars,“ sagði Ahern og sakaði mótmælendur, sem ekki vilja hlíta þessum fresti, um að vilja frekar „pólitískt getuleysi“ heldur en pólitísk völd.

Sigurvegarar þingkosninganna á Norður-Írlandi, sem haldnar voru á miðvikudag í síðustu viku, voru harðlínuflokkar bæði mótmælenda og kaþólskra, annars vegar Lýðræðislegi sambandsflokkurinn og hins vegar Sinn Fein.

Fyrir tveimur árum féllst Írski lýðveldisherinn, IRA, á að afvopnast og nú í byrjun þessa árs féllst Sinn Fein á að starfa með norður-írsku lögreglusveitunum, þótt þær verði áfram í höndum mótmælenda.