Áhrifamaður í áratugi

Chirac er fæddur í París árið 1933. Hann lét ungur heillast af Charles de Gaulle og ákvað snemma að helga líf sitt stjórnmálum. Hann gekk í franska Kommúnistaflokkinn um tvítugt, sótti nám í embættismannaskólanum École national d‘administration árin 1957-59 og fékk í framhaldi af því stöðu hjá ríkinu.

Árið 1962 hófst eiginlegur stjórnmálaferill hans þegar George Pompidou, sem þá var forsætisráðherra, gerði hann að starfsmannastjóra sínum.

Chirac bauð sig fyrst fram til þings fyrir Gaullistaflokkinn árið 1967 og varð ráðherra í ríkisstjórn Pierre Messmers árið 1972.

Chirac gegndi tvisvar embætti forsætisráðherra, fyrst árin 1974-76 og síðan aftur 1986-88, í seinna skiptið jafnhliða borgarstjórastarfinu sem hann gegndi í átján ár, frá 1977 til 1995.

Chirac bauð sig fyrst fram til forseta árið 1981 á móti Ciscard D‘Estaing, síðan aftur á móti Francois Mitterand árið 1988 en hreppti ekki hnossið fyrr en í þriðju tilraun árið 1995. Hann hefur verið forseti í tvö kjörtímabil, samtals tólf ár.

Árið 2002, á þjóðhátíðardegi Frakka 14. júlí, var reynt að ráða Chirac af dögum. Róttækur hægrimaður var þar á ferðinni, dró riffil upp úr tösku sinni og skaut á bílalest forsetans þegar hátíðahöldin stóðu sem hæst. Enginn varð fyrir skoti og tilræðismaðurinn var strax afvopnaður.