Kaka er lítt hrifinn af Chelsea og Liverpool

Brasilíumaðurinn Kaka hjá AC Milan segir að aðeins kæmi til greina að leika með liðum á Spáni eða Englandi ef hann færi einn daginn frá AC Milan. Hann er hrifinn af Manchester United og Arsenal en vill ekki fara til Chelsea eða Liverpool.

"Ég er mjög ánægður hjá Milan og ég á ekki von á að verði breyting á því á næstunni. Ef við hinsvegar tölum um "hvað ef" held ég að aðeins Spánn eða England kæmu til greina," sagði miðjumaðurinn snjalli.

"Ég er mjög hrifinn af Manchester United og líka Arsenal. Hvað Chelsea og Liverpool varðar finnst mér þessi lið of skipulögð fyrir minn smekk. Þau eru ekki eins frjó í spilamennsku og United og Arsenal, en þar eru samt góðir stjórar. Ég hef miklar mætur á Rafa Benitez," sagði Kaka.