Hryðjuverkaforsprakki drepinn

Khadaffy Janjalani, leiðtogi Abu Sayyaf-hryðjuverkahópsins, lést í átökum við hermenn 4. september 2006, að sögn yfirvalda á Filippseyjum. Þetta staðfesti DNA-próf í Bandaríkjunum.

Bandaríska sendiráðið lagði fimm milljónir bandarískra dala til höfuðs Janjalani, en hryðjuverkahópur hans er talinn bera ábyrgð á fjölda árása. Meðal þeirra var sprengjuárás á ferju, sem banaði 116 manns.

Lögreglan á Filippseyjum býr sig nú undir að samherjar Janjalanis reyni að efna til hefndarárása. Forseti landsins segist vilja uppræta fátækt, svo hryðjuverkamenn geti ekki tælt bágstatt fólk til ofbeldisverka.