Karríið komið hringinn

Breska karríveitingastaðakeðjan Nawaab stefnir á að opna nýjasta útibúið sitt einmitt þar sem sumir hefðu haldið að markaðurinn væri mettaður: í Delhí á Indlandi. Nú er eggið hins vegar farið að kenna hænunni, því nýi staðurinn flaggar á matseðlinum þjóðarrétt Breta úr karríhillunni: kjúklingur í tikka masala sósu, sem aldrei hefur verið seldur á Indlandi, svo vitað sé.

Rétturinn sem svo margir tengja við indversk eldhús og kryddmarkaði, er upprunninn á veitingastað í Glasgow í Skotlandi.

Nawaab-keðjan er fjölskyldufyrirtæki sem stefnir á heimsyfirráð eða dauða. Nawaab-staðirnir eru þegar yfir 150 talsins og stefnir fjölskyldan á að opna einnig staði í Múmbei á Indlandi, sem og í Barselóna og í Úkraínu á næstu 5 árum.