Sögulegir friðarsamningar í Nepal

Stjórnvöld í Nepal skrifuðu í dag undir friðarsamninga við skæruliða maóista sem marka eiga endalok tíu ára borgarastyrjarldar í landinu. Samkvæmt samningnum munu maóistar fá aðild að bráðabirgðaríkisstjórn sem skipuð verður í landinu og hafa þeir því ekki lengur stöðu uppreisnarmanna. Jafnframt verður Sameinuðu þjóðunum falið að fylgjast með vopnabúri maóista.

Stjórnmálaskýrendur segja samkomulagið sögulegt enda sé með því bundinn endi á áratugarblóðbað sem kostað hefur yfir 13 þúsund manns lífið. Maóistar og ríkisstjórn landsins samþykktu vopnahlé fyrir hálfu ári og hvöttu um leið konung landsins Gyanendra að endurreisa þingið og lýðræði í landinu og má segja að samkomulagið staðfesti vopnahléð.

Bæði forsætisráðherra Nepals, Girija Prasad Koirala, og Pranchanda, leiðtogi maóista, lýstu ánægju sinni með samkomulagið og sögðu nýja tíma hafna í landinu.