Óvíst hvort réttarhöldum yfir Saddam lýkur fyrir hengingu

Saddam Hussein mætti fyrir dómara í morgun, tveimur dögum eftir að dauðadómur var kveðinn upp yfir honum. Að þessu sinni snerust réttarhöldin um fjöldamorð hans á Kúrdum en óvíst er hvort þeim verður lokið áður en dauðadómnum verður fullnægt.

Blekið er varla þornað á dauðadómnum yfir Saddam Hussein sem hann fékk vegna morða á 148 sjíum árið 1982 þegar hann er kominn aftur í réttarsalinn því í morgun hélt málflutningur áfram í réttarhöldum vegna Anfal-herferðarinnar svonefndu. Talið er að í það minnsta 180.000 Kúrdar hafi látið lífið í þessum hefndaraðgerðum íraskra stjórnvalda sem upphófust í lok stríðsins við Íran á ofanverðum áttunda áratugnum.

Dauðadómnum yfir Saddam verður sjálfkrafa áfrýjað og er búist við að niðurstaða áfrýjunardómstóls liggi fyrir snemma á næsta ári. Enn er hins vegar óljóst hvort hægt verði að ljúka Anfal-málinu ef dauðadómurinn verður staðfestur því honum verður að fullnægja innan eins mánaðar. Kúrdar eru skiljanlega þeirrar skoðunar að öllum kurlum verði að koma þar til grafar en margir embættismenn, þar á meðal al-Maliki, forsætisráðherra, vill láta hengja Saddam án tafar.

Þá lýsti talsmaður klerkastjórnarinnar í Íran ánægju sinni í morgun með dóminn og kvaðst vona að Írakar yrðu ekki beittir þrýstingi um að framfylgja honum ekki. Ólga vegna dauðadómsins hefur verið mun minni í landinu en búist var við. Útgöngubanni var aflétt í höfuðborginni í morgun og hefur allt verið þar með kyrrum kjörum í dag.