Eiturlyfjabarón handtekinn í Brasilíu

Lögregla í Bandaríkjunum, Brasilíu og Kólumbíu hafa að líkindum greitt einum umfangsmesta eiturlyfjahring í heimi náðarhöggið með aðgerðum sínum fyrr í vikunni. Þá var leiðtogi hans og einn eftirlýstasti eiturlyfjabarón í heimi handtekinn.

Pablo Rayo Montano var tekinn höndum í fyrradag í Sao Paulo í Brasilíu. Auk hans voru rúmlega þrjátíu aðrir handteknir þar og í Bogota í Kólumbíu. Þá hafa yfirvöld í níu öðrum löndum handtekið rúmlega hundrað manns meðan á rannsókn hefur staðið. Aðgerðin hafði verið þrjú ár í undirbúningi.

Hald var lagt á rúmlega milljón bandaríkjadala í beinhörðum peningum, fjölmargar snekkjur og þrjár eyjur í eigu Montano þar sem talið er að hann hafi farið huldu höfði í tíu ár, eða frá því hann var ákærður fyrir peningaþvætti, smygl og skattsvik svo eitthvað sé nefnt. Montano er auk þessa sakaður um að hafa smyglað um 70 tonnum af kókaíni til Bandaríkjanna hið minnsta. Samkvæmt upplýsingum frá lögreglu munu smyglararnir hafa notað hrað- og kafbáta til að flytja kókaín og önnur eiturlyf frá höfnum í Kólumbíu.