Engin tímaáætlun nefnd

Tony Blair, forsætisráðherra Bretlands, svaraði mótstöðumönnum sínum fullum hálsi á blaðamannafundi í Downingstræti 10 í dag. Þrátt fyrir ítrekaðar áskoranir ætlar hann ekki að svara því hvenær hann lætur af embætti.

Eftir að Verkamannaflokkurinn galt afhroð í ensku sveitarstjórnarkosningunum í síðustu viku hefur vinstri armur þingflokksins sótt hart að forsætisráðherranum Tony Blair. Þingmennirnir krefjast þess að hann greini opinberlega frá því hvenær hann hyggist standa upp fyrir Gordon Brown fjármálaráðherra og helst sem allra fyrst. Í dag hélt forsætisráðherrann sinn fyrsta blaðamannafund frá því fyrir kosningar. Blair rifjaði upp að fyrir þingkosningarnar í fyrra hefði hann lýst því yfir að þær yrðu hans síðustu. Hann sagði að ekkert hefði breyst í þeim efnum, hann mun láta völdin í hendur eftirmanni sínum, Gordon Brown, fjármálaráðherra, þegar rétti tíminn til þess rynni upp en núna væri mikilvægast fyrir Verkamannaflokkinn að einbeita sér að því að stýra landinu. Tímasett brotthvarf forsætisráðherrans myndi hins vegar lama ríkisstjórnina í störfum sínum.

Stuðningur við Blair í þingflokki verkamanna er ekki mjög afgerandi eins og augljóslega kom fram í viðhorfskönnun BBC sem gerð var á meðal óbreyttra þingmanna flokksins. Allmargir vilja að forsætisráðherrann segi strax af sér embætti og aðeins fjórir vilja að hann stýri landinu allt fram að næstu kosningum sem að óbreyttu verða árið 2010. Andstæðingar Blairs telja að hann hafi fært Verkamannaflokkinn allt of langt til hægri og þeir sjá í Gordon Brown mann sem yrði uppruna flokksins trúrri. Blair sagði hins vegar Brown jafn einarðan stuðningsmann "nýja Verkamannaflokksins" eins og hann sjálfur og þeir sem héldu annað hefðu á röngu að standa.

Stjórnmálaskýrendur telja líklegast að Blair muni eftirláta Gordon Brown völdin í flokknum eftir þrjú ár í síðasta lagi og Brown muni svo boða til kosninga nokkrum mánuðum síðar.