Skógareldar í Noregi

Skólgareldar kviknuðu á tveimur stöðum í og við Björgvin í Noregi í gær. Greiðlega gekk að slökkva eldinn á öðrum staðnum á meðan enn logar á hinum. Flytja þurfti um 70 manns frá heimilum sínum um miðja nótt.

Miklir skógareldar kviknuðu í Kanadaskógi í Björgvin í gærkvöldi. Talið er að eldurinn hafi kviknað út frá grilli en efnt hafði verið til grillveislu á strönd rétt í skógarjaðrinum. Skotfærageymsla var staðsett í skóginum og þegar var farið í að fjarlægja allt þaðan út. Á meðan börðust slökkviliðsmenn við eldana og tókst að ráða niðurlögum þeirra um klukkan fjögur í nótt að íslenskum tíma. Þá var þegar búið að tryggja að nálæg hús væru ekki í hættu. Óttast er að eldur kunni að kvikna á ný þar sem vindasamt er á svæðinu. Því verða slökkviliðsmenn á vakt þar fram á kvöld og lengur ef með þarf.

Áður en það tók að loga í Kanadaskógi kviknaði eldur í Sotra, rétt fyrir utan Björgvin, síðdegis í gær. Skömmu eftir útkall töldu slökkvuliðsmenn að þeir hefðu náð tökum á eldinum og slökkt hann. Sú varð ekki rauninn því eldurinn blossaði upp á ný í nótt. Flytja þurfti um sjötíu manns frá heimilum sínum í nótt þar sem óttast var að eldurinn myndi teygja sig í nálæg hús. Eldurinn nær yfir um tíu ferkílómetra svæði frá Morland í suðri til Fjæreida í norðri. Eldurinn breiddi hratt úr sér vegna þess hve mikill vindur var á svæðinu. Talið er að um íkveikju sé að ræða og lögregla auglýsir því eftir upplýsingum frá almenningi sem gætu hjálpað til við að hafa upp á brennuvarginum.