Fangaflugið var umfangsmikið og kerfisbundið

Sérkennilegar leiðir fangaflugvéla bandarísku leyniþjónustunnar CIA frá einni borg til annarrar voru á meðal þess sem vakti grunsemdir rannsóknarnefndar Evrópuþingsins. Nefndin skilaði bráðabirgðaskýrslu sinni í dag þar sem því er haldið fram að CIA hafi flogið rúmlega þúsund sinnum í gegnum lofthelgi ESB síðan 2001 án þess að gera grein fyrir ferðum sínum.

Rannsóknarnefndin hefur undanfarna mánuði rannsakað hvort ásakanir um rekstur leynifangelsa CIA og fangaflutninga þeim tengdum eigi við rök að styðjast með því að grandskoða upplýsingar um flugumferð í aðildarríkjum ESB og yfirheyra fólk sem segist hafa verið haldið í slíkum fangelsum. Í dag kynnti nefndin skýrslu um fangaflugið sem hún segir bæði víðtækt og kerfisbundið. Giovanni Fava, formaður nefndarinnar, segir að CIA hafi flogið rúmlega þúsund sinnum í gegnum lofthelgi ESB síðan 2001 án þess að gera grein fyrir ferðum sínum.

Fava sagði að sérstaka grunsemdir hefði vakið hvernig fangaflugvélunum hefði verið flogið frá einni borg til annarrar og sagði öruggt að þær hefðu ekki verið að taka eldsneyti á þessum stöðum. Hann bætti því við að sökum þess hversu tíðar ferðirnar hefðu verið og sömu leyniþjónustumenn hefðu stýrt þeim væri mjög ólíklegt að ríkisstjórnir landa á borð við Ítalíu og Svíþjóð hefðu ekki vitað um þær. Næstu skref nefndarinnar verða svo að ferðast til Austur-Evrópu til að kanna hvort leynifangelsi hafi þar verið starfrækt. Ennfremur er ráðgert að ræða við bandaríska embættismenn um málið.