Fyrrum forsætisráðherra segir að eitrað hafi verið fyrir sér

Yegor Gaidar, fyrrverandi þingmaður í Rússlandi, sem einnig gegndi embætti forsætisráðherra um skamma hríð árið 1992, segist sannfærður um að andstæðingar rússneskra yfirvalda hafi eitrað fyrir sér. Það sé skýringin á skyndilegum og alvarlegum veikindum hans þann 24. nóvember.

Deginum áður hafði rússneski njósnarinn fyrrverandi, Alexander Litvinenko, látist á sjúkrahúsi í London eftir að hafa barist fyrir lífi sínu í þrjár og hálfa viku. Eitrað var fyrir honum með geislavirka efninu póloni 210. Sams konar eitrun hrjáir Dmitry Kovtun sem liggur á sjúkrahúsi í Moskvu og Ítalann Scarabella. Þeir hittu báðir Litvinenko að máli daginn sem hann veiktist.

Jafnframt er talið að þessar eitranir tengist morðinu á rannsóknarblaðakonunni Önnu Politkovskayu, sem skotin var fyrir utan íbúðablokk þar sem hún bjó í október. Samsæriskenningar nefna þetta raðmorð á frjálslyndum Rússum sem gagnrýnt hafa rússnesku ríkisstjórnina.