Þrjár erlendar konur særðust í átökum á Vesturbakkanum

Átök brutust út þegar mótmæli fóru fram í dag gegn múrnum sem Ísraelsmenn hafa verið að reisa undanfarin misseri á Vesturbakkanum. Fjórir eru sagðir hafa særst í átökunum, einn ísraelskur hermaður og þrjár erlendar konur. Meiðsl kvennanna, sem eru frá Svíþjóð, Bandaríkjunum og Þýskalandi, eru ekki alvarleg, að sögn Reuters-fréttastofunnar. Mikill hiti færðist í leikinn þegar mótmælendur reyndu að komast yfir afgirt svæði nærri múrnum í nágrenni bæjarins Bilin, en Palestínumenn gera tilkall til þessa landssvæðis. Skutu hermenn meðal annars gúmmíkúlum og táragasi að mótmælendum.