Hundruð manna yfirheyrð

Fimm hundruð manna sérsveit bresku lögreglunnar vinnur nú að því að rekja hvert spor í leitinni að morðingja fimm vændiskvenna í enska bænum Ipswich. Yfir 400 vegfarendur, sem leið áttu um rauðljósahverfi bæjarins um helgina, voru stöðvaðir og yfirheyrðir í von um að þannig fengjust betri upplýsingar um síðustu stundir hinna myrtu.

Einkum og sér í lagi voru hinir yfirheyrðu spurðir hvort þeir hefðu séð hina 24 ára gömlu Paulu Clennell, en nakið lík hennar fannst úti á fjölfarinni götu í bænum á þriðjudaginn var. Frá þessu greindi Stewart Gull, talsmaður rannsóknarlögreglunnar.

Áður hafði lögreglan upplýst að hún einbeitti sér nú að 50-100 manns sem hún vildi fá til yfirheyrslu. Á laugardag var birt myndband af einu fórnarlambanna, Anneli Alderton, úr öryggismyndavél í lestarvagni þar sem síðast sást til hennar.

„Við höfum tengt saman morðin fimm,“ sagði Gull. „Líklega leitum við bara eins manns, en fleiri gætu verið viðriðnir þetta og við megum ekki útiloka neitt.“

Morðingjanum hefur verið líkt við Kobba kviðristu, sem vakti ógn og skelfingu í London í lok 19. aldar.