Svartfellingar kusu sjálfstæði

Svartfellingar samþykktu í þjóðaratkvæðagreiðslu í gær að segja sig úr lögum við Serba. Þarlendir stjórnmálaleiðtogar telja leiðina inn í Evrópusambandið nú greiða. Serbar sitja hins vegar eftir með sárt ennið.

Eftir atkvæðagreiðslu gærdagsins virðist júgóslavneska ríkjasambandið heyra sögunni til. Munurinn gat samt tæpast verið minni því samkvæmt bráðabirgðaúrslitum voru 55,4 prósent þeirra sem þátt tóku í kosningunni fylgjandi því að Svartfjallaland sliti sambandinu við Serbíu. Forsætisráðherra landsins var sigri hrósandi þegar hann ávarpaði þjóð sína seint í gærkvöld.

Svartfjallaland varð hluti af Júgóslavíu við stofnun hennar árið 1918 og hélt svo sambandinu við Serbíu eftir að Júgóslavíu liðaðist í sundur á sínum tíma. Á síðustu árum hefur hins vegar æ fleiri Svartfellingum þótt sambandið við Serbíu vera dragbítur á framfarir í landinu og hafa kröfur um sjálfstæði orðið háværari í samræmi við það. Því ríkti mikill fögnuður í flestum héruðum Svartfjallalands í gær og í dag, til dæmis í höfuðborginni Podgorica.

Svartfjallaland er raunar sjálfstætt að flestu leyti nema að nafninu til, til dæmis er gjaldmiðillinn þar evra á meðan Serbar nota dínar. Mikill áhugi er fyrir Evrópusambandsaðild og í dag gáfu leiðtogar þess í skyn að viðræður um í það minnsta aðgang að mörkuðum gætu hafist fljótlega. Brýnasta úrlausnarefni ríkisstjórnarinnar er hins vegar afar slæmt efnahags- og atvinnuástand en nálega þriðji hver Svartfellingur hefur ekkert starf. Sóknarfærin, til dæmis á sviði ferðaþjónustu, eru hins vegar fjölmörg og því líta landsmenn almennt björtum augum til framtíðarinnar. Hið sama er ekki að segja um Serba sem innan skamms gætu búið í landluktu ríki.

Úrslitin í gær eru jafnfram byr í segl sjálfstæðissinna í Kosovo en viðræður um framtíðarstöðu þess standa nú yfir. Því er ekki loku fyrir það skotið að í lok þessa árs hafi ríkjum Evrópu fjölgað um tvö.