Kínverjar fá fjóra kjarnakljúfa

Fulltrúar Kína og Bandaríkjanna skrifuðu á laugardag undir samning sem greiðir leið Westinghouse Electric Co. til að byggja fjóra kjarnakljúfa í Kína. Bandarísk fyrirtæki skutu með þessu frönskum og rússneskum samkeppnisaðilum ref fyrir rass og hljóðar verkefnið upp á marga milljarða bandaríkjadala.

„Þetta er spennandi dagur fyrir bandarískan kjarnorkuiðnað,“ sagði Samuel Bodman, orkumálaráðherra Bandaríkjanna. „Þetta fordæmi sýnir að ef við vinnum saman þá getum við bætt viðskiptasamband okkar og sameiginleg markmið um öryggi í orkumálum.“

Samningurinn mun skapa um fimm þúsund störf í Bandaríkjunum, að sögn Bodman. Franska fyrirtækið AREVA var annar valkostur kínverska yfirvalda, en þau höfðu hafnað boði rússneska fyrirtækisins AtomStroyExport.

Bandaríkin hafa barist gegn byggingu kjarnakljúfa í Íran, en lögðu mikið undir til að fá að semja við kommúnistastjórnina í Kína.

Bygging átján kjarnakljúfa er í bígerð í Asíu, en það eru um sjötíu prósent allra kjarnakljúfa sem nú eru í byggingu í heiminum.