Klofningur í Bólivíu vegna stjórnarskrár

Hundruð þúsunda Bólivíumanna tóku á föstudagskvöld þátt í mótmælum í Bólivíu gegn Evo Morales forseta og fyrirhuguðum stjórnarskrárbreytingum sem hann vill gera.

Morales forseti nýtur stuðnings rúmlega helmings þingmanna á stjórnlagaþingi landsins og vill að einfaldur meirihluti nægi til þess að semja drög að nýrri stjórnarskrá, þótt hann fallist á að aukinn meirihluta, 2/3 hluta þingmanna, þurfi til að samþykkja lokadrögin þegar þau liggja fyrir.

Andstæðingar hans vilja hins vegar að aukinn meirihluti þurfi að samþykkja hvert ákvæði nýju stjórnarskrárinnar áður en lokadrögin verða lögð fram til atkvæðagreiðslu.

Íbúar Bólivíu eru annars vegar indíánar, sem eru í meirihluta og búa flestir við fátækt í fjallahéruðum í landinu vestanverðu, og svo afkomendur Spánverja og annarra evrópskra landnema sem búa við töluvert meiri velsæld á láglendinu austan til.

Morales er fyrsti forseti landsins sem kemur úr röðum indíána. Eftir að hann náði kjöri í sumar hófst hann fljótlega handa við að styrkja stöðu indíána, eins og hann hafði lofað í kosningabaráttunni.

Meðal annars kallaði hann saman sérstakt stjórnlagaþing, sem hefur það hlutverk að semja nýja stjórnarskrá fyrir landið þar sem réttindi indíána verði betur tryggð.

Andstæðingar Morales í austurhéruðum landsins, þar sem mest er um auðlindir í jörðu, ganga svo langt að hóta því að kljúfa landið með því að lýsa yfir sjálfstæði austurhlutans fallist hann ekki á þessa meginkröfu um 2/3 meirihluta.

„Annar helmingur þjóðarinnar segir: Ég hef verið í þessari stöðu í 500 ár og Evo er frelsari minn,“ sagði Eduardo Gamarra, bólivískur stjórnmálafræðingur við háskóla í Flórída í Bandaríkjunum. „Hinn helmingurinn segir: Ef þeir fá sínu framgengt þá get ég alveg eins flutt til Miami.“

Sjálfur segist Morales ekkert hafa við það að athuga að andstæðingar hans efni til mótmæla, en hann segist staðráðinn í að beita hervaldi til að koma í veg fyrir aðskilnað austurhlutans.

„Við erum byrjaðir að ná Bólivíu aftur á okkar vald,“ sagði hann og beinir hörðum orðum að auðugu kaupsýslumönnunum sem eru í fararbroddi aðskilnaðarmanna: „Nú þegar þeir geta ekki selt Bólivíu þá vilja þeir skipta Bólivíu í tvennt, það er aðalmálið. En það verður engin skipting landsins.“