Einkavæðingaráform kynnt

Sænska ríkisstjórnin, undir forystu hægrimannsins Frederiks Reinfeldts, tilkynnti fyrir helgina að hún hygðist selja hlut ríkisins í sex fyrirtækjum. Þar á meðal eru fjarskiptafyrirtækið TeliaSonera, Nordea-bankinn og kauphallarfyrirtækið OMX, sem Kauphöll Íslands gekk nýlega til liðs við.

„Stjórnin hefur ekki ákveðið hvenær, hvernig eða í hvaða röð þessi fyrirtæki verða seld,“ sagði Maud Olofsson, orkumálaráðherra og formaður Miðflokksins, á blaðamannafundi í Stokkhólmi.

Sænska ríkið á að öllu leyti eða hlut í einum sextíu fyrirtækjum.

Verðmætastur er 20 prósenta hlutur þess í Nordea-bankasamsteypunni.

Að svo komnu máli hyggst stjórnin hins vegar ekki bjóða til sölu hlut sinn í flugfélaginu SAS. Þar sem félagið er sameign þriggja ríkisstjórna, Svíþjóðar, Noregs og Danmerkur, þarf fyrst að ná pólitísku samkomulagi milli ríkisstjórnanna þriggja um einkavæðingu félagsins. Að ná slíku samkomulagi gæti verið hægara sagt en gert.