Kröfugerð Þjóðverja æsir Pólverja

Samtök sem kalla sig „Prússneska umboðsnefndin" og segjast gæta hagsmuna Þjóðverja sem flæmdir voru burt af landar- og fasteignum sínum á landsvæðum sem gefin voru Póllandi eftir síðari heimsstyrjöld, hafa skotið kröfugerð sinni til Mannréttindadómstól Evrópu, á þeim grundvelli að eignasviptingin og brottreksturinn hafi verið brot á Mannréttindasáttmála Evrópu.

Farið er fram á að eignunum verði skilað eða skaðabætur greiddar fyrir þær, að því er talsmaður samtakanna, Gerwald Stanko, tjáði AP á föstudag.

Þótt samtökin séu alger jaðarhópur og hafi ekki umboð til að tala fyrir munn nema mjög lítils hluta þeirra milljóna Þjóðverja sem þurftu að flýja heimkynni sín í því sem áður voru austurhéruð Þýskalands - en aðeins um eitt þúsund manns standa að baki „Prússnesku umboðsnefndinni" - þá veldur kröfugerð hennar gríðarlegum hugaræsingi meðal Pólverja, enda hafa pólskir fjölmiðlar verir ósparir á fréttaflutning af málinu. Hinn þjóðernissinnaði forseti Póllands, Lech Kaczynski, sagði að kröfugerðin myndi „hrinda af stað mjög hættulegri atburðarás".

Þýsk stjórnvöld hafa gefið mjög skýrt til kynna að þau styðji ekki kröfur samtakanna og sameiginleg lögfræðinganefnd beggja ríkisstjórna komst að þeirri niðurstöðu að ekki væru lagalegar forsendur fyrir kröfum um slík eignaskil. Þá hafa regnhlífarsamtök brottflæmdra í Þýskalandi, Bund der Vertriebenen (BdV), ítrekað lýst því yfir að þau hafi ekkert með athafnir „Prússnesku umboðsnefndarinnar" að gera. „Við höfum lýst vanþóknun okkar á þessu ótal sinnum," sagði Erika Steinbach, forseti BdV, en hún á einnig sæti á þýska Sambandsþinginu.