Leiðtogi al-Qaeda í Írak segist persónulega ábyrgur fyrir morðum

Nýr leiðtogi al-Qaeda hryðjuverkasamtakanna í Írak, Abu Hamza al-Muhajer, hefur sent frá sér tilkynningu þar sem hann lýsir ábyrgð á hendur sér fyrir pyntingar og morð á tveimur bandarískum hermönnum sem rænt var af herstöð í síðustu viku. Í yfirlýsingunni segir að Muhajer hafi með eigin hendi myrt mennina.

Ef þetta reynist rétt er það í fyrsta sinn sem óhæfuverk af þessu tagi er tengt Abu Hamza al-Muhajer síðan tilkynnt var að hann tæki við stjórn al-Kaída í Írak af Abu Musab al-Zarqawi, sem féll í loftárás Bandaríkjahers fyrr í þessum mánuði.

Yfirlýsingin var birt á vef regnhlífarsamtaka hryðjuverkafélaga í Írak sem al Qaeda í Írak tilheyrir. Ekki kom fram í yfirlýsingunni hvort myndband af ódæðisverkunum yrði birt á vefnum líkt og áður hefur verið gert. Staðfest var fyrr í dag að lík hermannanna hefðu fundist og að þau bæru þess merki að mennirnir hafi verið pyntaðir.